Avisos

INSCRICIÓNS CAMIÑO A CAMIÑO NO 010 (986810260 dende móbil)
HORTAS URBANAS: DENDE O 1 DE XUÑO MODIFÍCANSE OS HORARIOS PASANDO A SER DE 9 A 12h POLAS MAÑÁS E DE 18 A 21 POLAS TARDES
3-4 XUÑO. RUTAS POR GALICIA: ANCARES. 65 euros. Inscrición dende luns 22 maio. Máis información na entrada do 20 de maio.
28 MAIO. IV Andaina polos Montes de Vigo. Inscrición dende luns 15 maio. Máis información na solapa Andaina Montes Vigo

22/5/17

Inscrición na IV Andaina polos montes de Vigo ata o venres 26 de maio

O proceso de inscrición na IV Andaina polos montes de Vigo, organizada polo Concello de Vigo en colaboración con Montes de Vigo, prosegue a bo ritmo e está aberto ata o venres 26 de maio nas dúas sedes previstas: 5º andar de El Corte Inglés (deportes de montaña en horario comercial) e Casa da Xuventude (López Mora 31, de 9 a 14h e de 17 a 20h).

Coa inscrición entregarase un vale para recoller a camiseta da IV Andaina en El Corte Inglés entre a tarde do xoves 25 e o venres 26 de maio.



Lembrar que existe un amplo abano de posibilidades de participación (ver folleto):
Percorrido completo da Andaina: 40,1 km. Control en Praza do Rei as 7:00 para coller os autobuses e iniciar a andaina as 8:45 dende Vigozoo. Realízanse os tres tramos trazados.

Percorrido Medio 1 da Andaina: 28,9 km. Control en Praza do Rei as 7:00 para coller os autobuses e iniciar a andaina as 8:45 dende Vigozoo. Realízanse os dous primeiros tramos trazados.

Percorrido Medio 2 da Andaina: 20,1 km. Control en Praza do Rei as 8:30 para coller os autobuses e iniciar a andaina as 9:30 dende a Área Recreativa do Pouso en Bembrive. Realízanse os dous últimos tramos trazados.

Percorrido curto da Andaina: 11,2 km. Control en Praza do Rei as 10:00 para coller os autobuses e iniciar a andaina as 11:30 dende o Parque Forestal de Beade. Tamén se pode acceder en coche ao propio PF Beade as 10:30 e realizar directamente o control de saída.. Realízase o último tramo trazado.

Pequerruta: 1,8 km. Trazado adaptado para familias con nenos/as moi pequenos. Logo poderase proseguir no novo Espazo de Multiaventura (con Tirolina, Rocódromo, Ximcana medioambiental, etc) creado no propio Parque Forestal de Beade. É preciso inscribirse no Percorrido curto, ben na modalidade de saída na Praza do Rei ou ben na saída no propio parque forestal.

Ruta adaptada a persoas con mobilidade reducida: 5,1 km. Está previsto que o servizo de apoio con sillas adaptadas para persoas con mobilidade reducida estea operativo o domingo 28. Neste caso a inscrición faise directamente na Concellería de Medio Ambiente, que informará dos detalles da dinámica.


Segunda quenda en Cíes con novas historias


Segunda quenda de visita a Cíes con presenza do Sr. Alcalde, con agradable temperatura e con moi boas sensacións. Resulta reconfortante que ao mesmo que se vai dando a coñecer a historia das Illas Cíes, vaian incorporándose novas historias. Iso foi o que aconteceu neste domingo que, como por arte de maxia, distintos participantes na visita e os propios residentes na illa (Emilio do Camping, tres mulleres que levan toda a vida na illa, etc) narraron acontecementos relacionados coa vida na mesma. 

Así, por exemplo, unha nova aprendizaxe foi que as Illas Sicas (secas) resulta que eran o subministro de auga dos barcos ao longo da historia, aproveitando as inagotables fontes que dun xeito natural brotaban na illa. 

Outra anécdota foi saber que un lugareño da illa, unha vez feita á desafortunada reforestación franquista, pasou a ser o garda forestal e ser premiado directamente polo "Generalísimo" coa suba de 3 pesetas polo "eficaz traballo".

Tamén foi emotivo o momento no que unha participante nos contou en primeira persoa a desgracia do choque do cargueiro de coches cun barco pesqueiro, que resultaba ser da súa familia.

En definitiva, un dia que resultou expléndido e moi ilustrativo no tocante ao coñecemento do impacto humano na illa ao longo dos séculos. Ver fotografías históricas (premer)

Isto todo aderezado cun efecto visual semellante a un tsunami. Ver fotos aqui e unha mostra nesta nova.


21/5/17

Fin de semana en Ancares con Camiño a Camiño


A Concellería de Medio Ambiente a través do programa Camiño a Camiño ten previsto para o 3-4 de xuño unha Ruta por Galicia que percorrerrá novos espazos dos Ancares ata agora non visitados.

O sábado farase un percorrido circular por Donis, visitando o Castelo e esta parroquia de Cervantes de onde dín que é orixinario Miguel de Cervantes. O domingo irase ata Puerto Ancares e ascenderase ata Miravalles, un lugar dende onde se gozará unha vista panorámica increíble que acada Picos de Europa, Ponferrada e outros moitos lugares.

A preinscrición principia este luns 22 de maio no 010, tendo que pasar posteriormente por Casa da Xuventude (López Mora 31) ata o xoves 25 para entregar cuberta a ficha correspondente (premer aqui) e facer 45 euros de achega (os restantes 20 euros o día da saída). 

Como en edicións pasadas, o aloxamento terá lugar na Cantina Mustallar e no Hotel Piornedo tendo que indicar a preferencia no tocante a compartir habitacións.